Amadini yasabye Leta kwemererwa guterana rimwe mu cyumweru, anayigaragariza uburyo azakoresha mu gukumira Coronavirus.

Ihuriro ry’Amadini n’Amatorero mu Rwanda, RIC, ryandikiye Urwego rw’Imiyoborere (RGB), ryerekana zimwe mu ngamba ryiteguye kubahiriza mu kwirinda icyorezo cya Coronavirus, mu gihe leta yaba ibakomoreye bagakomeza ibikorwa byo gusenga.

Amakuru avuga ko tariki 28 Gicurasi uyu mwaka, iri huriro ryandikiye Minisitiri w’Intebe risaba ko amateraniro yo gusenga n’ibindi bikorwa by’imiryango ishingiye ku myemerere byakoroherezwa kugira ngo nabyo bitangire gukora.

Tariki 5 Kamena uyu mwaka, habaye inama yahuje abahagariye guverinoma n’ubuyobozi bwa RIC, yari iyobowe na Minisitiri w’Ubutegetsi bw’Igihugu, Prof Shyaka Anastase. Iyo nama yari igamije kungurana ibitekerezo ku byifuzo bya RIC bijyanye n’ibikorwa byo gusenga muri iki gihe cya Coronavirus.

RIC yasabwe gutegura no kwerekana ingamba zigaragaza uko biteguye kwirinda Coronavirus mu nsengero, kiliziya n’imisigiti, kugira ngo zisuzumwe n’inzego za leta.

RIC kandi yasabwe gushishikariza, kwigisha no gukurikirana ko abayobozi b’amadini n’amatorero bubahiriza amabwiriza ya leta yo kwirinda kandi abanyuranyije nayo bagafatirwa ibihano n’ubuyobozi bwabo badategereje inzego za leta.

Abanyamadini bagaragaje ibitekerezo byabo. Ibaruwa ndende yashyizweho umukono na Visi Perezida wa RIC, Dr Laurent Mbanda, igaragaza ko RIC yemera ko COVID-19 ari icyorezo cyugarije Isi yose harimo n’Abanyarwanda, kandi bashyigikiye ingamba zafashwe na leta y’u Rwanda ndetse na OMS mu kwirinda ikwirakwira ryacyo.

Abayobozi b’iri huriro bavuga ko bemera ko bagomba kugira uruhare mu kwirinda ubwabo n’ababo, kurinda abayoboke n’imiryango yabo no gufatanya n’inzego z’ubuyobozi bw’igihugu mu gutanga amakuru no gukora ubukangurambaga bugamije gukangurira abantu gukumira, kwirinda no kurwanya iki cyorezo.

Amakuru ducyesha Igihe, akomeza avuga ko iyi baruwa igaragaza ko ubuyobozi bwa RIC bwandikiye RGB buyimenyesha ingamba bwatekereje zirimo gusukura inyubako zisengerwamo nka Kiliziya, urusengero cyangwa umusigiti mbere na nyuma yo guteramo hakoreshejwe isabune n’amazi meza.

Hari kandi gushyiraho uburyo bwo gukaraba intoki, kandagira ukarabe cyangwa hand sanitizer, kugura utumashini dupima umuriro kandi abantu bagapimwa mbere yo kwinjira mu nyubako basengeramo, kwicaza mu rusengero basiga nibura metero imwe hagati y’umuntu n’undi, kwambara udupfukamunwa mu bihe by’amateraniro.

Hari kandi gushyiraho abashinzwe gusukura ubwiherero n’abashinzwe gufasha abantu kubukoresha muri gahunda yo kubahiriza umuco wo gukaraba mbere na nyuma yo kubujyamo no kumenyesha imiryango igize RIC amabwiriza ajyanye na COVD-19 agomba gukurikizwa n’imiryango ishingiye ku myemerere.

Hari kandi ko iteraniro rimwe ritagomba kurenza amasaha abiri, ahasengerwa hakaba ari ahari hasanzwe habera amateraniro kandi hujuje ibisabwa.

Harimo no guteganya nibura isaha hagati y’amateraniro abera mu cyumba kimwe kugira ngo haboneke umwanya wo gusukura.

Iyo nyandiko ikomeza iti:“Muri ibi bihe haba hasubukuwe amateraniro amwe gusa, (ayo ku cyumweru ku aba-porotesitanti, abagatolika, abarokore). Ku wa Gatandatu ku Badivantisite b’umunsi wa karindwi, no ku wa Gatanu ku Bayisilamu. Andi materaniro yazatekerezwaho nyuma hashingiwe ku buryo abayoboke bagenda bubahiriza amabwiriza yo kwirinda coronavirus n’uko icyorezo kizagenda gishira mu gihugu”.

RIC ivuga ko usoma misa n’undi wese uyoboye gahunda, yakwemererwa kutambara agapfukamunwa mu gihe ahagaze imbere kandi hakubahirizwa nibura intera ya metero ebyiri.

Hari kandi ko buri rusengero rugabanya umubare w’abantu bayobora indirimbo hubahirizwa intera ninini nibura metero ebyiri mu gihe baririmba, gusuhuzanya abantu bahana amaboko no guhobera bikaba bikaba bibujijwe, gusangira cyangwa gukoresha mikoro rusange nabyo ntibibe byemewe.

Uyu muryango uvuga ko guhazwa byakorwa “hakoreshejwe kwakira mu biganza, uhaza n’uhazwa bambaye udupfukamunwa kandi hagati yabo hari intera ya metero imwe. Hari no gukomeza kwita ku ntera ya metero imwe abantu bajya gufata ukarisitiya”.

Mu byo amadini yagaragaje, harimo ko

“amateraniro ya nijoro, ibiterane binini by’ivugabutumwa ntibyemewe, gusengera mu byumba by’amasengesho rusange ntibyemewe, amateraniro y’abana ntiyemewe, amateraniro yo mu matorero-remezo ntiyemewe n’ibikorwa byo gusengera abantu barambikwaho ibiganza”.

RIC Kandi yabwiye RGB ko byaba bibujijwe guhanahana ibikoresho, urugero gufata ibitabo by’indirimbo, korowani na bibiliya.

Mu rwego rwo kwirinda guhanahana icyibo cyangwa igiseke cy’amaturo, RIC ivuga ko hagomba gushishikarizwa abayoboke guturira kuri mobile money, money transfer, bank transfer no gushyiraho ibiseke bitazengeruka mu bantu.

Bavuga ko mu gihe cyo gushyingura umurikistu witabye Imana, byakorwa hubahirizwa amabwiriza rusange ya leta, isakaramentu ryo gushyingirwa mu rusengero ntirigomba kurenza abantu 50.

Abashyingirwa n’ababaherekeje bagomba ngo gukurikiza amabwiriza yose, bashishikarizwa kandi ntibakore ibirori nyuma yo gushyingirwa.

Batisimu ku bizera ba Gatolika yajya ikorwa uyihabwa n’uyitanga bambaye udupfukamunwa kandi igakorwa muri misa y’abantu bake hanubahirizwa intera ikwiye.

Mu gihe ibi bikorwa kandi byasubukurwa, abanyamadini bemeye ko umubatizo ku baporotestanti, abarokore n’abadivantisite b’umunsi wa karindwi kuko bo bashyirwa mu mazi menshi muri rusange, waba uhagaritswe.

RIC ivuga ko Abayisilamu basabwa buri muntu kujya gusari yitwaje umukeka we muto wo gusengeraho, kugenda yitwaje ibikoresho byo gutawaza, gukoresha korowani yo muri telefoni no kudakora muri korowani cyangwa ibindi bitabo biri mu musigiti.

Ubuyobozi bwa RIC buvuga ko nyuma yo gutanga ibyo bateganya gukora muri RGB, bazategereza igisubizo bazahabwa n’ubuyobozi bw’igihugu.

Akira website uyu munsi ikoze neza uko ubishaka ku mafaranga make angana na 80k.

Turakubakira website iri mubwoko bukuri Kira:

iyu rusengero ndetse na NGO.

Ubucuruzi (Kwamamarizaho ibyo ukora)

Ikinyamakuru nkugire n’inama y’uburyo online Blogs zungukamo.

NB: Harimo na domain name muri ariya mafaranga. Kora share wowe ubishaka nuzana umukiriya ndaguha commission. Mpamagara kuri 0788920788

Kwizera Yamini

About Kwizera Yamini

Kwizera Yamini is a talented Journalist at fiesta250.com, in sports, entertainment and many other fields. He started his career as an author in 2016. Do you have any update? contact him via yamini@fiesta250.com or kwizerayamini@gmail.com

View all posts by Kwizera Yamini →

Leave a Reply

Your email address will not be published. Required fields are marked *