Gen Maj Ruvusha yahishuye inkomoko y’Abanzi benshi b’u Rwanda

Gen Maj Emmanuel Ruvusha, umuyobozi w’Ingabo z’u Rwanda mu Ntara y’Amajyepfo, yavuze ko u Rwanda ari igihugu cyiza buri wese yakwifuza guturamo ariko anasobanura ko ari igihugu gifite abanzi benshi bashaka kugihungabanya kubera ishyari n’ubugome.

Yabigarutseho kuri uyu wa Kane ubwo yagiranaga ikiganiro n’abayobozi b’inzego z’ibanze mu mirenge yo mu Karere ka Nyaruguru ihana imbibi n’ishyamba rya Nyungwe.

Ni igikorwa cyabereye mu Murenge wa Ruheru aho abagizi ba nabi baherutse kugaba igitero baturutse mu Burundi. Iyo mirenge ni Kivu, Muganza, Nyabimata na Ruheru.

Gen Maj Ruvusha yashimye abaturage uburyo bafatanyije n’inzego z’umutekano ndetse n’ubuyobozi mu kubungabunga umutekano abasaba kubikomeza kuko bose babifitemo inyungu.

Abayobozi b’imidugudu yo mu mirenge ya Kivu, Muganza, Nyabimata na Ruheru bateze amatwi ikiganiro bahawe na Gen Maj Ruvusha

Yabibukije ko ibikorwa byose by’iterambere n’imibereho myiza bigerwaho bishingiye ku mutekano uri mu gihugu, avuga ko inshingano za mbere z’abayobozi n’inzego z’umutekano ari ugushakira abo bayobora umutekano kugira ngo ibyo bakora birambe kandi bibe byubakiye ku musingi ukomeye.

Ati:“Umuyobozi mwiza ni ushakira abaturage be umutekano kuko ahatari umutekano nta n’iterambere ryahaba, n’iterambere ribaho ari uko rishingiye ku mutekano. Mbere yuko ushaka n’iterambere urabanza ukarishakira umutekano kugira ngo rya terambere ugiye kubaka ribe rishingiye ku mutekano mwiza”.

Gen Maj Ruvusha yavuze ko u Rwanda ari igihugu cyiza ariko gifite abanzi benshi bityo Abanyarwanda bose bagomba gushyira hamwe bagakumira uwashaka kubahungabanya no gusenya ibyiza bagezeho.

Ati:“Bayobozi muteraniye ahangaha ndagira ngo mbabwire ngo dufite igihugu cyiza buri wese yakwifuza kubamo, dufite igihugu cyiza ariko gifite abanzi benshi. Umuntu yakwibaza ati ‘abo banzi benshi baraturuka he?’ iki gihugu gifite abanzi benshi bashingiye ku ishyari; kuko hari bamwe bari bazi ko igihugu cy’u Rwanda cyazimye kubera amahano yabereye muri iki gihugu; muzi ibyabaye muri iki gihugu sinirirwa mbisubiramo aho Abanyarwanda barenga miliyoni bishwe bazira uko Imana yabaremye”.

Yasobanuye ko Nyuma ya Jenoside yakorewe Abatutsi, abanyarwanda bagize ubuyobozi bwiza bwabafashije kunga ubumwe, kwiyubaka no gusezerera ibibi banyuzemo byabatesheje agaciro bagamije kubaka igihugu cyiza.

Gen Maj Ruvusha yagaragaje inkomoko y’abanzi benshi b’u Rwanda

Gen Maj Emmanuel Ruvusha yavuze ko abanzi b’u Rwanda bifuzaga ko rukomeza kuba mu bibazo batunguwe no kubona rwiyubatse bagira ipfune, batangira gushaka uko bakongera kuruhungabanya.

Ati:“Abari bazi ko twarundukiye mu mwobo barumiwe, rya shyari rya pfunwe bamwe batwifurizaga inabi nyamara ya nabi tukayirenga, bamwe bari bazi ko tutazabaho, bakaba babona igihugu kikiriho, aho ni ho ba banzi baturuka”.

Yababwiye ko igisubizo cy’ibyo byose ari ugushyira hamwe nk’Abanyarwanda bagahangana n’uwo ari we wese ugerageza gusenya ibyo igihugu cyagezeho.

Yasabye abaturage gukomeza gukora irondo bicungira umutekano kandi bakajya batanga amakuru ku nzego z’umutekano n’ubuyobozi igihe cyose babonye hari umuntu ushobora kuwuhungabanya.

Yibukije ko benshi mu Banyarwanda banyuze mu mateka mabi y’amacakubiri n’ihezwa, asaba ko muri iki gihe buri Munyarwanda akwiye guharanira kuraga abamukomokaho igihugu cyiza gituwe n’abunze ubumwe.

Kuva mu myaka ishize mu Karere ka Nyaruguru hakunze kugabwa ibitero n’abantu bitwaje intwaro, Ingabo z’u Rwanda zabasubiza inyuma bagahungira mu Burundi.

Umuyobozi w’Ingabo z’u Rwanda mu Ntara y’Amajyepfo, Gen Maj Emmanuel Ruvusha, aha igare umwe mu bakuru b’imidugudu mu Karere ka Nyaruguru

Mu ijoro ryo ku wa 1 Nyakanga 2018 abagizi ba nabi bitwaje intwaro bateye mu Karere ka Nyaruguru mu Murenge wa Nyabimata biba ibintu by’abaturage birimo amatungo n’ibiribwa.

Nyuma yaho hari ibindi bitero byagabwe muri Nyaruguru mu Murenge wa Nyabimata, byishe abaturage ndetse bitwika imodoka, binasahura abaturage. Ni ibitero birimo ibyagabwe n’umutwe witwara gisirikare wa FLN, wari ufite Nsabimana Callixte “Sankara” nk’umuvugizi. Uyu afungiwe mu Rwanda.

Igitero giheruka cyagabwe ku wa Gatandatu tariki 27 Kamena 2020 n’abantu bagera mu 100, bitwaje imbunda zirimo mashinigani (machine guns) n’izirasa za rockettes, bafite umugambi wo kugirira nabi abatuye mu Mudugudu w’icyitegererezo wa Yanza, uri mu kilometero kimwe gusa uvuye ku mupaka w’u Burundi.

Kuri uyu wa Kane kandi abayobozi b’imidugudu 93 yo muri Mirenge ya Ruheru, Nyabimata, Kivu na Muganza bashyikirijwe amagare nk’ishimwe bahawe na Perezida Kagame Paul kuko bagira uruhare mu kwicungira umutekano no kuwubungabunga.

Abakuru b’imidugudu bari bitabiriye icyo gikorwa bavuze ko bacyishimiye kandi bagiye kurushaho kuzuza inshingano zabo no gutoza abo bayobora kubungabunga umutekano

Abakuru b’imidugudu bari bitabiriye icyo gikorwa bavuze ko bacyishimiye kandi bagiye kurushaho kuzuza inshingano zabo no gutoza abo bayobora kubungabunga umutekano.

Nubahimana Emmanuel uyobora umudugudu wa Nyacyonga mu Murenge wa Ruheru ati “Tugiye kurushaho kugera kure, dukora byinshi bitanga umusaruro.”

Gen Maj Emmanuel Ruvusha, yavuze ko n’ubwo abanga u Rwanda ari benshi, bazahinduka nk’uburo bwinshi butaryoshya umusurururu, Abanyarwanda nibashyira hamwe bakabarwanya.

Inkuru ya Igihe

Akira Website yawe uyu munsi guhera ku mafaranga 80k (Web design)

Turakubakira website iri mubwoko bukuri Kira:

iyu rusengero ndetse na NGO.

Ubucuruzi (Kwamamarizaho ibyo ukora)

Ikinyamakuru nkugire n’inama y’uburyo online Blogs zungukamo.

NB: Harimo na domain name muri ariya mafaranga. Kora share wowe ubishaka nuzana umukiriya ndaguha commission. Mpamagara kuri 0788920788

Kwizera Yamini

About Kwizera Yamini

Kwizera Yamini is a talented Journalist at fiesta250.com, in sports, entertainment and many other fields. He started his career as an author in 2016. Do you have any update? contact him via yamini@fiesta250.com or kwizerayamini@gmail.com

View all posts by Kwizera Yamini →

Leave a Reply

Your email address will not be published. Required fields are marked *