Menya Imbogamizi uruhuri zikomeje kubangamira urugendo rwo gukurikirana abakekwaho ibyaha bya Jenoside

Kuva Jenoside yakorewe Abatutsi mu 1994 yarangira, u Rwanda rukomeje urugamba rwo gushakisha abakekwaho kuyigiramo uruhare bihishe mu bihugu bitandukanye ku Isi, aho kugeza ubu habarwa abarenga igihumbi bari mu bihugu birenga 30 byiganjemo ibya Afurika.

Magingo aya Ubushinjacyaha bw’u Rwanda bumaze gutanga impapuro 1144 zisaba guta muri yombi abakekwaho uruhare muri Jenoside mu bihugu 33 byo hirya no hino ku Isi, aho umubare munini uri muri Afurika.

Ibihugu icyenda bimaze kuburanisha 23 bakekwaho uruhare muri Jenoside, naho abamaze koherezwa mu Rwanda ni abantu 24 nabo bamaze koherezwa n’ibihugu icyenda, bigaragaza umubare muto w’abakurikiranywe mu gihe abandi bakidegembya.

Mu bantu bari bakomeye mu buyobozi bwa Habyarimana bagishakishwa barimo nka Protais Mpiranya wari ukuriye abarinzi b’Umukuru w’Igihugu. Harimo kandi Fulgence Kayishema, Phénéas Munyarugarama, Aloys Ndimbati, Ryandikayo na Charles Sikubwabo, nabo bashakishwa ndetse byemejwe ko nibafatwa bo bazaburanishwa n’u Rwanda.

Umuyobozi w’Ishami rishinzwe gukurikirana abakekwaho uruhare muri Jenoside, Siboyintore Jean Bosco, yabwiye ikinyamakuru Igihe ko mu kazi kabo bahura n’imbogamizi zitandukanye zirimo ko usanga abakekwaho uruhare muri Jenoside bagera mu mahanga bagahindura amazina, bakiyita Abarundi cyangwa se Abanye-Congo bo mu bwoko bw’Abanyamulenge kuko nabo bavuga Ikinyarwanda.

Benshi muri aba bakekwa, bajya mu bihugu byo muri Afurika, bakiga ururimi, bagafata imico y’abo basanze ndetse n’ubwenegihugu bagahinduka ku buryo udashobora guhita ubamenya mu buryo bworoshye.

Ibi bikubitana n’uko ibihugu bimwe na bimwe bidakoresha ikoranabuhanga ku rugero ruhambaye, ku buryo udashobora kwifashisha ikoranabuhanga ngo umenye ngo umuntu runaka atuye aha n’aha cyane ko hari n’abo usanga baramaze gukoresha impapuro mpimbano.

Ati:“Ikindi tubona nk’imbogamizi, ni aho bamwe bahawe ubwenegihugu, kandi itegeko nshinga ry’ibyo bihugu hamwe n’iryacu, ntabwo ryemera kohereza ahandi umwenegihugu. Ugasanga iyo tubakurikiranye tukababasaba, usanga batabatwoherereza ahubwo bakatubwira ko amategeko yabo atabemerera kuba bakohereza abenegihugu babo”.

Ibyo bihugu iyo bibaye ngombwa ko bibaburanisha, haba imbogamizi y’uko hari ibihugu bidafite icyaha cya Jenoside mu mategeko yabyo ku buryo usanga ukekwa bimuburanisha nko ku cyaha cy’ubwicanyi mu gihe yagombaga kuburanishwa ku cyaha cya Jenoside kuko yo igira umwihariko n’ibihano biremereye.

Siboyintore avuga ko iyo ari imbogamizi ikomeye kuko umuntu aba adashobora koherezwa mu gihugu cyamusabye, byaba na ngombwa ko aburanishwa, bikaba ku nyito itariyo kuko mu mategeko yabo icyo cyaha kitabamo ku buryo ubona umuntu yahawe igihano gito.

Ati:“Hari igihugu kimwe cyigeze gutanga imyaka itandatu n’amezi umunani kuri Jenoside. Twe tubibonamo nk’imbogamizi ikomeye kuko uhanwe ntabwo aba ahawe igihano gihawe n’ibyo yakoze”.

Amategeko y’u Rwanda agena ko umuntu wese ukoze, haba mu gihe gisanzwe cyangwa mu gihe cy’intambara, icyaha cya Jenoside ahanishwa igifungo cya burundu cy’umwihariko.

Siboyintore akomeza asobanura ko iyo abakekwaho ibyaha bya Jenoside badafashwe ngo baburanishwe, aho bari bakomeza ibikorwa byo guhembera ingengabitekerezo yayo, bakanayipfobya.

Umunyamabanga Nshingwabikorwa wa IBUKA, Ahishakiye Naphtal, yabwiye Igihe ko ikibazo cya Jenoside yakorewe Abatutsi atari icy’u Rwanda gusa aho bagerageza gushaka inshuti z’amahanga zamagana iyi myitwarire idahwitse y’ibihugu bikigendamo biguru ntege.

Yavuze ko hari nk’ababyeyi b’incike bageze mu za bukuru bababazwa no kuba batazigera babona ubutabera bw’ababahemukiye.

Ati:“Kugira ngo umuntu yitabe Imana atabonye ubutabera nyuma y’imyaka 26 ni ikimwaro ku gihugu cyaba gicumbikiye bariya bantu. Usibye n’incike, umuntu wese iyo atekereje ko hashize imyaka 26 hari umuntu wari ruharwa aho yari atuye, wakoze jenoside ku rwego rukomeye akabona ataraboneka ni ikibazo gikomeye”.

Ese Kuki ibihugu bigenda biguru ntege mu gukurikirana abakekwaho Jenoside?

Mu bihugu bitari ibya Afurika bifite umubare munini w’abakekwaho ibyaha bya Jenoside harimo u Bufaransa n’u Bubiligi naho muri Afurika harimo RDC na Uganda aho abakekwaho Jenoside bari bafite ubushobozi bwo kuba bahunga n’amaguru.

U Bubiligi bwaburanishije abantu icyenda muri 23 bamaze kuburanishwa n’ibihugu mu gihe bufite abagera kuri 40 bashakishwa. U Bufaransa bwo hariyo 47 ariko bumaze kuburanisha batatu.

Siboyintore ati:“Nk’u Bufaransa bwatangiye kuburanisha Abanyarwanda butinze. Simbikangwa Pascal niwe wa mbere baburanishije, nyuma haza Tito Barahira na Ngenzi Octavien. Ufashe nk’imyaka 26 ukavuga ngo bamaze kuburanisha batatu, ubwo ni ukuvuga ngo nk’abantu 44 baba basigaye, ugendeye kuri iyo myaka birashoboka ko nta n’umwe mu bategereje ubutabera wazapfa abubonye. Bivuze ngo rero ko hagomba ingamba zo kongera umuvuduko mu kuburanisha”.

Mbere ibihugu byitwazaga ko bidashobora kohereza mu Rwanda abakekwaho ibyaha bya Jenoside bivuga ko mu gihe ibyo bakekwaho byakorwaga, nta tegeko ryari rihari mu gihugu rihana icyo cyaha.

Siboyintore avuga ko bitumvikana kuko ibyo bihugu byarengaga bigafata nk’ukekwa bikamwohereza muri ICTR i Arusha, kuko abaye aricyo bigenderaho, no muri ICTR ntibyari kuba byaramwoherejeyo.

Ati:“Ntekereza ko ari izindi mpamvu zitari izo, kuko bibaye ibyo mu mategeko nta shingiro byaba bifite. Kuba barahisemo kuburanisha nabyo turabyemera, ariko nibura bakaba babyihutisha kugira ngo abanyarwanda babone ubutabera”.

Avuga ko ntacyo byaba bimaze mu gihe abarokotse jenoside ari nabo batangabuhamya bazasaza cyangwa bakibagirwa batabonye ubutabera, kuko n’iyo bwazagerwaho bo ntibazaba barabubonye.

Abajijwe niba hari icyizere ko aba bose barenga igihumbi bazafatwa, Siboyintore yavuze ko “bizatinda ariko na Kabuga yarafashwe” ariko ko bo byoroshye kuko abenshi batihishahishe, ndetse ko ubu za Ambasade z’u Rwanda hirya no hino zikora ibiganiro n’ibihugu zibarizwamo ku buryo abo bantu bafatwa bagashyikirizwa inkiko.

Inkuru ya Igihe

Turakubakira website iri mubwoko bukuri Kira:

iyu rusengero ndetse na NGO.

Ubucuruzi (Kwamamarizaho ibyo ukora)

Ikinyamakuru nkugire n’inama y’uburyo online Blogs zungukamo.

NB: Harimo na domain name muri ariya mafaranga. Kora share wowe ubishaka nuzana umukiriya ndaguha commission. Mpamagara kuri 0788920788

Kwizera Yamini

About Kwizera Yamini

Kwizera Yamini is a talented Journalist at fiesta250.com, in sports, entertainment and many other fields. He started his career as an author in 2016. Do you have any update? contact him via yamini@fiesta250.com or kwizerayamini@gmail.com

View all posts by Kwizera Yamini →

Leave a Reply

Your email address will not be published. Required fields are marked *